"Main achhe gharane se thi aur shadi bhi bare paise wale gharane main hui magar Pakistan main rupe ki rel pel ne mere shohar ko sharabi bana diya. Main kiya ker sakti thi. Yake baad degre 3 betian paida ho gain. Main unhe bara kerne main lug gai. Magar jub sharabi shohar ke sharabi doston ki pehle nazrain, aur phir daraz haat, jawan hoti betioN pe parne lage to main kisi tarah visa le ker America aa gai.
Jese tese ker ke yahan aik naukri mili. Naukri dene wale ne 'Green card' ka lalach de ker khub 'abuse' kiya. Main ne poore 4 baras, aik chutti kiye bagair, aik desi restaurant main 12 12 ghante lagatar kaam kiya. 4 baras baad pata laga sab jhut tha. Immigration ka kubhi koi case file hi nahi huwa tha. Peeche se shohar ne talaq bhijwa di. Ooper se internet aa gaya. Mere bahir rehne ke baais betian poora poora din chatting pe guzarne lagiN, 'boys' ke saath 'hang out' kerne lagin....... Ajeeb kash-makash main thi. Naukri chorun to ghar kese chalaun. Naukri pe rahun to jin jawan betioN ke liye des chora wahi bigri jaayain. 9/11 ka waqiya ho gaya. Immigration na-mumkin ho gai. Employer ke tevar aur char gaye.
Aur phir aik Allah ka farishta aaya.
Hamare restaurant pe aik 70-75 baras ka homeless "kalla" har subh coffee peene aata tha. Use Pancreatic cancer tha. 9/11 ke waqiye ke baad har koi immigration ka sawal poochta. Aik din main ne use apni bipta sunai. Us "kalle" ne kaha: 'main to kuch dinoN main mar jaunga, tum mujh se shadi ker lo'. Hum dono ne chupke se 'court marriage' ker li. Main ne use ghar main aik kamra de diya. Main ne dusre din hi 'papers' file ker diye. Woh subah sawere ghar se nikal jaata aur raat mere ghar aane ke baad lautta ke use maalum tha mujeh jawan betioN ki fiqar rahe gi. Khud hi ja ker apni 'chemotherapy' kerwata, hospital main admit ho jaata ya discharge ho jaata. American immigration ne har tarah se kureda magar us shaks ne mera saath na chora. Us ne badle main na to kubhi kuch manga aur na hi kubhi mujeh chune ki kisi khawish ka izhar kiya.(Haan albatta apartment building main muqeem dusre desioN ne jeena dobhar ker diya). ....Hum sab ko bil-aakhir green card mil gaya. 4 mahine baad woh faut ho gaya. Hum hi ne church main uski aakhri rasoomat ka bandobast kiya.
Waqt guzarta gaya. Betian khairiat se bari ho gain, 2 ki shahdi achhi jagah ho chuki hai. Mera ghar bun gaya, apna restaurant ho gaya. Salam is mulk ko aur shukar Allah ka ke din pher diye. Magar aaj bhi us shaks ki tasveer mere bedroom ke sarahne rakhi hai. Har saal main us ki qabar pe aik diya jalati hun. Jub tuk is mulk main meri auladain abad rahain gi us ka jalaya diya jalta rahe ga.
Jub apne saare saath chor gaye, aik homeless "kalla" kaam aaya - jinhe hum sub ko haqarat se dekhne ki adat ho gai hai.
You may hear above story below
4 comments:
i absolutely agree with the line.i live in germany and i have both pakistani and "goray"friends.and i have seen goray people being more sympathetic and understanding than desi.and i feel sad about the fact.
stereotyping i guess....
is this really true story and real life story ????
Yes! All stories on this blog are true. Names, places and wherever possible 'Time period' and sequence has been changed solely to protect the privacy.
Post a Comment