Sunday, September 30, 2007

Izzat, Daulat aur Shaurat

Kul Talat Hussain se "Aaj TV" pe General Zia ka aik qissa sunne ko mila. (At that time Talat was working as an assistant to Stephen Cohen)

General Zia aik din
Stephen Cohen ke saath presidency ki balcony main khare huwe the jahan se poora Islamabad nazar aata tha. Unhon ne Stephen Cohen se poocha: "Do you know Mr. Cohen, why I stand here ?" . Stephen Cohen ne kaha: "I don't know". General Zia ne bari rauunat se jawab diya: "Because nothing in Islamabad escape from my eyes". Stephen Cohen ne poocha: "But what about your back ?". To General Zia ne jawab diya" Mountains are at my back" (mutlab ye tha ke Pakistan army, aur shayed he meant america, are at his back).

3 months later Zia died in a plane crash !


Izzat, Daulat aur Shaurat allah ka inaam, amanat aur aazmaish hai. Woh jise chahey bagair hisab deta hai. Magar insan ko halimi apnani chahiyye. Jo de sakta hai woh le bhi sakta hai. Jo cheez aaj hai, shayed kul na ho !!

Saturday, September 29, 2007

The Bridges of Madison County


Agar aap ne Robert James Waller ka mashoore zamana novel "The Bridges of Madison County" parha ho to aap ko maalum hoga ke ye 171 pages ka, aik chota sa, aasan angrezi main likha huwa novel hai. Magar ye baat samjhne main mujhe barson lag gaye ke is novel main aesi kiya baat hai ke jis ne bhi parha (it sold so far 12 million copies), ye novel hamesah ke liye us ke dil main bas gaya. Per author of novel "certain moments in which the ordinary can take on rather extraordinary qualities."

Baat ye hai ke hum sub aik mikanki (mechanical) zindagi to guzarte hain, jis main shadian kerte hain, bachhe paida kerte hain, karobar kerte hain wagera wagera - magar zindagi ke kisi mor pe 2 ya 3 din aese aate hain (ye poora novel bus 4 din ki kahani hai) , jin ki yaadain dil ki deewar per aese sabt ho jaati hain ke poori zindagi pe bhari ho jaati hain. Agar aap ko novel parhne ka time nahi hai to Clint Eastwood aur Meryl Streep ki is novel pe bani film zaroor dekhiye (preferably read novel).

Ye dil saala wa'qiye bara harami hai ke, kese aik 45 saal ki aurat, do bachhon ki ma aur wafa shuar biwi, aik anjaane shaks ke sahar main zindagi bhar ke liye giraftar ho jaati hai - aur kehti hai: "Tum mujhe le jana chaho ge to main apne aap ko rok nahi paaun gi magar ye saali (damn) meri zimandarian - mere 2 bachhe aur mera shohar" !

Aur yeh hakeektein bhi saalee bari harami hain... un teen chaar dinon mein bhi peecha nahin chortien...



See these 2 clips, it will give you idea: Song, Robert leaving

Friday, September 28, 2007

Monsoon ke Baad

Log kehte hain september aur october main khub qudrati aaftain aati hain aur duniya main bare bare siyasi waaqiyat hote hain, magar mujhe september bohut achha lugta hai kiun ke, aasman se sub kuch dhulne ke baad ujla ujla khubsurat sa bara bara chand nikalta hai. Zameen ke janoobi hisse main rehne waalon ka chaand to september main bohut bara ho jata hai. Baqol Faiz

Chand ka dukh bhara fasanaye-noor
ShahrahoN ki khak main galtaaN

Pedro Zapeta ka bhayanak khawab

This is reverse version of "dubai chalo" nightmare !


Pedro Zapeta, an illegal immigrant, managed to save $59,000 while working as a dishwasher for 11 years. Two years ago, Zapeta was ready to return to Guatemala, so he carried a duffel bag filled with $59,000 -- all the cash he had scrimped and saved over the years -- to the Fort Lauderdale-Hollywood International Airport. But when Zapeta tried to go through airport security, an officer spotted the money in the bag and called U.S. customs officials..........

Zapeta, who speaks no English, said he didn't know he was running afoul of U.S. law by failing to declare he was carrying more than $10,000 with him. Anyone entering or leaving the country with more than $10,000 has to fill out a one-page form declaring the money to U.S. customs. Officials initially accused Zapeta of being a courier for the drug trade, but they dropped the allegation once he produced pay stubs from restaurants where he had worked. Zapeta earned $5.50 an hour at most of the places where he washed dishes. When he learned to do more, he got a 25-cent raise.


After customs officials seized the money, they turned Zapeta over to the Immigration and Naturalization Service. The INS released him but began deportation proceedings....

"They are treating me like a criminal when all I am is a working man," he said.

Robert Gershman, one of Zapeta's attorneys, said federal prosecutors later offered his client a deal: He could take $10,000 of the original cash seized, plus $9,000 in donations as long as he didn't talk publicly and left the country immediately. Zapeta said, "No." He wanted all his money. He'd earned it, he said.

Marisol Zequeira, an immigration lawyer, said illegal immigrants such as Zapeta have few options when dealing with the U.S. government.

"When you are poor, uneducated and illegal, your avenues are cut," he said.

On Wednesday, Zapeta went to immigration court and got more bad news. The judge gave the dishwasher until the end of January to leave the country on his own. He's unlikely to see a penny of his money. "I am desperate," Zapeta said. "I no longer feel good about this country." Zapeta said his goal in coming to the United States was to make enough money to buy land in his mountain village and build a home for his mother and sisters. He sent no money back to Guatemala over the years, he said, and planned to bring it all home at once.

At Wednesday's hearing, Zapeta was given official status in the United States -- voluntary departure -- and a signed order from a judge. For the first time, he can work legally in the U.S.
By the end of January, Zapeta may be able to earn enough money to pay for a one-way ticket home so the U.S. government, which seized his $59,000, doesn't have to do so.


Source: http://www.cnn.com/2007/US/09/27/immigrant.money/index.html

Monday, September 24, 2007

Darguzar

Bus lafzon ka pher hai magar har mazhab ki pehli taalim yahi hai ke, saath ke insaanon se mohabbat karo aur darguzar se zindagi guzaro. Duniya main namaz, roze (means ritual of any religion) se bhi ziyada agar sab se mushkil koi kaam hai to 'everyday life' main darguzar ka wasaf apnana hai. Ye waqiya mujhe peechle dinoN aik 'iftar party' main sunne ko mila. I think its worth sharing.

"2 baras pehle ramzan ka ye waqiya hai. Meri nai nai shadi hui thi. Main roommates ko chor ker aik apartment main move ho gaya. Barabar ke apartment main aik hispanic family rehti thi. Woh mian biwi aur 4 bachhe the. 'Husband' construction worker tha aur biwi dusron ke gharon main 'maid' ka kaam kerti thi. Bachhe poora din ghar main uddham machate rehte. Aksar raat gaye tuk hamain awazain aati rehti thi. Kubhi bhagne dorne ka hangama aur kubhi deewar pe ball marne ki awaz. Humne 2/3 baar knock ker ke shikayat bhi ki. Un ko angrezi nahi aati thi. Main ne unki bari bachhi jo 12/13 baras ki hogi, se baat ki. 2/3 din khamoshi rehti phir wahi halla gulla. Main bhi thora 'honeymoon' phase main tha. Biwi ke saamne shahrukh khan bunne ka shoq tha. Aik din raat 11 baje hum bedroom main bethe laptop pe film dekh rahe the ke phir dhar dhar ki awazain shuru ho gai. Aik hafte se roze rukh rukh ke main kafi 'irritate' chal raha tha. Mujhe gussa aaya aur main ne police call ker li. Police aai to baat bohut aage barh gai. Woh yun ke police ne unka legal state check kerna shuru ker diya. Mian biwi undocumented the. Meri wajah se poori family dubara mexico deport ker di gai. xxxxx Bhai ! ab saari zindagi bhi roze rakhun to qayamat ke din meri khalasi nahi hogi. Zara si baat thi magar mere gusse ne woh aag bharkai ke 6 zindagian jal ker raakh ho gaiN".

Friday, September 21, 2007

Hawwa ki beti

Very touching poem, printed in urdu newspaper 'jang' (taken shamelessly from blog of 'suffering with behaviours' but paid off with my own translation and send it to editor of newspaper's magazine. I hope Ms. Shahida Israr Kanwal get it)



Daughter of Eve
Wearing shroud of 'customs'
little dreaded, little afraid
fearfully bundled in herself
either scared of (her own) loved ones, or of people
unaware of privilege of finding her own destiny
sustaining all atrocities, being doll of contentment
as sacrifice and suffering, from nature
granted to her with birth (in her genes)
And she !
knowing her 'evangelical rights' upto words only
(but) can't (even) move her lips
because her loved ones
told her to remember only her duties
and 'stuck' in this 'racket' since ever
atleast so far, she is unable to get freedom

Thursday, September 20, 2007

Ratan Bai urf Rattie


Duniya main samandar se bhi gehra agar koi zakham hai to woh insaani rishton ka zakham hai.

Mohammad Ali Jinnah ko log 'man of iron will' kehte the. Agar kisi aik shakhs ne Pakistan banaya to woh Mohammad Ali Jinnah ka dimag tha (Its another story that we turned the biggest political achievement of 20th century into biggest fiasco). Aesa shaks zindagi main sirf 2 baar roya. Pehli baar jub woh apni biwi ki qabar ko matti de raha tha aur dusri baar jub hindustan chorne se pehle woh aakhri baari apni biwi ki qabar pe gaya!

Jub lambe baalon wali Ratan Bai urf Rattie, daughter of bombay's cotton tycoon Dinshaw Maneckji Petit, Mohammad Ali Jinnah ke ishq main giraftar hui to sirf 16 baras ki thi aur Jinnah ki umer 40 baras thi. 24 baras ki umer ka faraq bhi kuch na ker saka. Mohabbat ke liye rattie ne baap ka ghar chor diya aur jinnah ne raja shahab mehmoodabad se mili qimti anghuti rattie ko pehna di. Magar ye mohabbat, quaid-e-azam ki siyasi zindagi ki bhainat char gai. Shadi ke pehle 4 saal baad, ratti apni bachhi ko utha ker london chali gai magar jinnah ki mohabbat usey phir bombay khench laayi. Dono ki koshish ke bawajood ye 'relationship' nahi chali. Quaid-e-azam ki muslim leauge bar bar bich main aati rahi. Saali ratti ki sokan. Dono ki phir alehdgi ho gai. Rattie, jo ab maryiam thi, ko Jinnah ki mohabbat ka gum kha gaya. Apni 29win salgirah ke roz Rattie akelepan main bombay ke Taj Hotel ke aik kumre main is duniya ko chor gai.

Rattie khud to chali gai magar peeche aik zinda laash chor gai. Aik aesi laash jis ne Pakistan to bana diya magar apne dil ki weraniyaN na bhar saka.
18 baras baad bhi agar dubara roya to wahin jahan pehli baar roya tha !


* (baqol quaid-e-azam ke driver 'azad' ke, woh raat ki taariki main apni biwi aur beti ke kupron ko saamne rukh ker roya kerte the).

Wednesday, September 19, 2007

Main roze kiun nahi rakhta


Main roze kiun nahi rakhta,
Uska jawab hafeez jhalandari ki ye nazam hai.

(With beautiful English translation at sub-title)


Tuesday, September 18, 2007

Hadsa aik dum nahi hota



Urdu ke shayer qabil ajmeri ka sher hai

Waqt kerta hai parvarish barson
Hadsa aik dum nahi hota

(It takes an age to built, event does not happen instantly)

Agar aap apni zindagi pe nazar daalain to 20/30 baras pehle hone wale waqiye aaj se jure nazar aayain ge !

Sunday, September 16, 2007

Ibne Insha


Urdu adab main 'mizah' bohut kum likha gaya magar jitna bhi likha gaya woh paaye (standard) ka likha gaya. Tamam zarafat likhne walon main ibne insha ka apna aik munfarid muqam hai. Agar aap mujh se poochain ke baqi "humorist" aur insha main kiya faraq hai to bus itna ke...baqi logon ki tehreeron pe ruk ruk ke hasi aati hai, magar insha ke hur jumle pe hasi aati hai.
You can read his book "Chalte ho to chin ko chaliye" online here

Friday, September 14, 2007

Dukan aur Makan


Allah jannat naseeb kare, mere nana aik bari achhi baat kehte the: "Insaan ki dukan uthti hai to uth jaaye magar kubhi usey uska makan na bechna pare. Makan ki deewaron main insaan ki khushbu, khayalat, saansain, aarzuain aur batain rach bas jaati hain. Derina makan chorna pare to lagta hai jese apna koi hissa kut gaya ho. Ma baap ke baad makan ki chat allah ki dusri chaun, therao aur zameen se rishta hota hai. Jub tuk mumkin ho beta, apna makan na bechna".

Previous post on nana


Thursday, September 13, 2007

Aqalbandi


Punjabi ki aik khawat hai: "Jade rub ruthe te aqal ruthe"

Mutlab jub allah ki rehmat ruthti hai aur jub insaan ki shamat aati hai to aadmi ki aqal band ho jaati hai aur woh pe-darpe bewaqoofi ki harkatain shuru ker deta hai !! - Aur aap sochte hi reh jaate hain ke ye achhe bhale insaan ko kiya ho gaya hai ?

allah insaan ko aqal-mand hi rakhe aur aqal-bandi se bachaye.

Tuesday, September 11, 2007

Shaukat Siddiqui


Shaukat Siddiqui urdu ke aese writer hain, jis ke baare main har subh zulfiqar Ali Bhutto puchte the ke, "aaj shaukat siddiqui ne kiya likha hai" (Shaukat Siddiqui Bhutto ke dor main aik akhbar ke editor the). Agar aap ne un ke do mashoor novel ya us pe bani TV serials "Khuda ki Basti" or "Jaangloos" parhi ya dekhi ho to aap ko andaza ho jaaye ga ke kese unhon ne muashre ke na'suroN pe nishtar aazmai ki hai.

Jub main ne unka afsana "Kaali Bala" * parha to mujhe pehla khayal ye aaya ke: "Ye afsana is sawal ka jawab hai ke kiun main ne aur mujh jese laakhon middle class logon ne pakistan chora. Hum nahi chahte ke hamari aulad ka bhi wahi haal ho jo is kahani main aik school master ke bachhon ka huwa".


(It may remind you of earlier posts like sam ne pakistan kiun chora and Aik kahani)

* Shaukat Siddiqui's "Kaali Bala" Page 1, Page 2, Page 3, Page 4, Page 5, Page 6, Page 7, Page 8, Page 9, Page 10, Page 11

Monday, September 10, 2007

Bare Makan

Haseena Moin ki kahi hui aik baat aksar yaad aati hai ke, "agar makan bohut bare hon to insaan dur chale jaate hain". ...Kitni sach baat hai. Makan jitne bare hote jaate hain, utni ziyada deewarain bich main aa jaati hain.

Sunday, September 09, 2007

Jis din se dekha hai tum ko sanam


Lately ! I am really enjoying this song of Mehdi Hasan (one of his best). Beautiful poetry, voice and music.

Saturday, September 08, 2007

Saadat Hasan Manto

Jis ne Saadat Hasan Manto ko nahi parha, us ne urdu literature ko nahi parha.... He was the master of human psychology and probably the greatest of the sub-continent's short story writers. On top of that, though his language is very simple, he is so brutal....Main peechle 25 baras se Manto ko parh raha hun, aur har baar us ka qad pehle se aur bara ho jata hai.

Baqol mere aik dost ke: "Jis ne Manto ki 'kaali shalwar' aur 'thanda gosht' nahi parha, us ke dimag ka azarband abhi tak band hai"!


Taken from Khaled Ahmed's article (with thousand thanks to Raza Rumi)

"Before 1947, Muslims offended with the fahashi (obscenity) of Saadat Hasan Manto took him repeatedly to court, only to hear the Muslim judges under British Raj say that what Manto wrote was high culture, not obscenity. After 1947, every time he was dragged before the court for obscenity, he was convicted! The judge in Karachi gave him tea in the evening and told him he was the country’s greatest short story writer, but convicted him for obscenity in the morning".

Thursday, September 06, 2007

Taa'rif


Kul kisi ne mere blog ki taa'rif ki to mujhe aik purani baat yaad aa gayi:

Aik no-paida 'journalist' ko us ke editor ne kamre main bulaya aur kaha, 'tumhare columns ke baare main jitne khat aaye hain sab main tumhari taa'reef hai'.

Journalist ne kaha: 'sir aap us aik shaks ko dhundhe jis ne khat nahi likha?'.

Editor bara satpataya aur bola: "aesa aik shaks kaun hai?"

Journalist ne kaha ke: "Main khud".

"Kiya matlab?"

"Matlab ye ke sir !, jub tuk log meri taa'rif ker rahe hain theek hai, lekin jis din main khud apne liye taarifi khatoot likhna shuru ker dun, woh din aapke liye lamhaye-fiqriya hoga"


Moral of the story: Dusre bhale insaan ki taa'rif kerte rahain magar behtar hai aadmi ko khud apni khamioN ka ilm rahe aur dusron ki tehseen se deewana na ho jaaye.

Wednesday, September 05, 2007

Comfort Inn


'Shazo' ne shayed theek hi kaha ke - Mohabbat bus aik comfort level hi hai ke aap kitna apne aap ko, bagair kisi khauf ke, kisi se - 'share' ker sakte hain !

Monday, September 03, 2007

Palmistry - whispering of witch!


Mere shuru ke blogs ziyada tar 1 ya 2 lines ke hote the, jis ka maqsad sirf apne liye waqiat ya cheezon ko yaad rakhna tha.

2 saal pehle main ne likha tha: "I classify 'ilm' (knowledge) of palmistry as whispering of witch !" Ye alfaz mere nahi the, kisi aur ke the.

Har naujawan ki tarah mujhe bhi haat ki lakirain dikhane ka shoq tha. Main Pakistan ke aik mashoor palmist ke paas pauncha. Ye sach hai ke unki batai hui bohut si batain, aage chal ker sach saabit huin. Kuch arse baad mujhe ilm huwa ke us palmist ne apni "practice close" ker di hai. Mujhe bari hairat hui. Main ne un se rabta karne ki koshish ki. Shuru main to unhon ne wajah batane se gurez kiya magar phir allah jaane unke dil main kiya aai ke is sakht waade pe ke, main unka naam kisi ko nahi batunga, unhon ne wajah batai: "Jis din se main ne apni aik nawasi aur aik pote ke haat main khudkushi (suicide) ki lakeerain dekhi hai, mera sara sakoon barbaad ho gaya hai. Na jaane main ne kitne hi logon ke dil ka sakoon cheena hoga. ....now I classify knowledge of palmistry as whispering of witch !"

Saturday, September 01, 2007

Rasheeduddin ka khusion bhara gharana


Mere Pichle post main aap ne aik be-sukoon gharane ka haal parha, ab usse bilkul ulat kahani suniye. 

Asim se meri dosti kese hui, ye ab yaad nahi. Na to hum school college main saath parhe aur na hi woh hamare mohalle main rehta tha. Shayed doston ke doston se milte milate kahin dosti ho gai. Dosti koi bohut gehri to nahi thi magar aksar hum saath motorcycle pe beth ke lassi peene nikal jaate the aur gup shup lag jaati thi.

Aik sham, Asim bari ujlat main mere paas aaya bola - saath chalo ge? Main ne kaha - sub theek to hai? Qissa kuch yun tha ke, Asim ko apni walida aur bahen ko le ker kisi ke ghar jana tha aur maqsad larka larki ko shadi ki baat ki garz se milwana tha. Wese to larke wale larki ko dekhne aate hain magar Asim ki amma pehle se Taale gaye rishton se pareshan thi aur kehti thi baar baar 'bur dikhawwa' ho aur larki ki baat pakki na ho to mohalle wale tarah tarah ki batain kerte hain. To is baar Asim ki khala ne larke ke ghar hi chai paani ka bandobast ker diya. Asim dara dara sa tha, kher main 'moral support' ke liye saath ho liya.

Hum char log taxi main beth ke 'shah faisal colony' ki taraf rawana huwe. (Asim ke walid faut ho chuke the). Shah faisal colony karachi ki aik 'lower middle class' basti hai jo us zamane main punjabi-muhajir jhagron ke baais khub mashoor thi. Tang-o-tareek galion main se taxi guzarti rahi. Asim kagaz pe likhi directions taxi wale ko de raha tha. Koi ghante baad hum aik choti si gali ke sirahane paunche. Makan ka number check ker ke taxi wale ko rawana kiya. Neeche to dukanain thi, makan ooper tha. Main ne dil main kaha - kiya yahan larki bihain ge? Kher ooper paunche to larke ki amma ne darawaza khola. Bare tapak se milin. Makan kiya tha chota sa kamra tha jis main aik 'tube light' jul rahi thi. Aik sofa aur 2/3 chairs thi. Do konon pe 2 bister lage the aur aik pe kumbal orhe "larka" so raha tha ! Larke ki amma ne larke ko uthaya. Woh bhi mehman dekh ke harbara ke uttha. Aadhi neend main haat milaya. Larke ka naam tha Rasheed aur poora naam Rasheeduddin. Akela bachha tha aur us ke walid bhi faut ho chuke the. Larke ki shakal dekh ke main to bara satpataya. Koi 6 inch lambi daarhi thi

Larka mun haat dhone chala gaya. Asim ki aur rasheed ki amma batain ker rahi thin.

Asim ki amma: "Dekhain bahen, hamari aik hi beti hai. Koi ziyada dhan daulat nahi magar larki parhi likhi hai. Som-o-salat ki paband hai. Aap kahain gi to parda bhi ker le gi. Magar bus hamari larki khush rahe aur mekaa' hi bhool jaaye"

Rasheed ki amma: "Hume kuch nahi chahiye bus larki nek ho aur mere bete ka khayal rakhe. Ghar aap ne dekh hi liya hai. Sufed poshi ka bharam qaaim hai aur allah ke fazal se kisi ke aage haat nahi pehlate...." wagera wagera

Aur main idhar dil hi dil main sochta raha - ye koi pagal huwe hain jo larki ko is jhannum main dhakel rahe hain. Main apne aap ko bara 'modern' aur 'liberal' samjhta tha. Maulvion se ghin aati thi. Jub Rasheed kamre main wapas aaya to baal sanware huwe the aur bathroom se saaf suthra gehre kathai (dark brown) rang ka shalwar kameez pahen ke aaya tha. Main ne kaha; "Dekho Rasheed Bhai, achha hai larki aur larka khud aapas main baat ker lain. Koi baat aap inko kehna chahain ya shayed inko kuch kehna ho. Zindagi ka muamla hai". Rasheed ne jawab diya: "Dr. sahab (halanke main to abhi 4th year main tha magar asim ne raub maarne ki liye mujhe dr keh ker milwaya tha). Aap bilkul theek kehte hain. Mujhe koi aitraz nahi. Magar ghar aap ke saamne hai, yahan akele baat kerna mushkil hai. Neeche aik Khan shahab ka hotel hai. Achhi malai wali chai banata hai. Family ka alag intizam hain. App logon ko aitraz na ho to hum wahan beth ke shayed ziyada asani se baat ker sakain" (Sach poochain, ye baat sun ke mujhe hasi bhi aai aur bohut hairat hui - main daarhi waale maulvi se itni 'liberalization' expect nahi ker raha tha).

Asim ne apni bahen ki taraf dekha. Asim ki bahen ne dupatta orha tha. Us ne bhai ke kaan main kuch kaha. Asim ne uth ke amma ke kaan main kuch kaha. Aur phir amma ne jo kaha, mere pairon tale se zameen nikal gai. Amma ne kaha: "Aap logon ke baare main pehle se achha sun ke hi yahan aaye hain. Hamari beti ko kuch nahi poochna. Use larka pasand hai. Agar aap logon ko koi baath poochni hai ya kehni hai to keh lain aur munasib samjhain to baat aage barhain".

Rasheed ki amma ne use dekha to Rasheed ne bhi sir hila diya !!

Mian biwi raazi , kiya kare ga qazi

Asim ne mujhe dekha to meri aankhon main use poori taqreer nazar aayi ke - "gadhe aadmi ! ikloti bahen ko kahan dhakel rahe ho. Saari zindagi burqa pehnte nikal jaaye gi. Aur maulvi to wese hi biwion ki khub pitai kerte hain. Ooper se gurbat to dekho..... Bahen pe rahem karo.................."

Magar Rasheed aur asim ki bahen ka nikah ho gaya. Suhag raat us makan main kese hui, mujhe ilm nahi. Na mayon hui, na mehndi. Na jahez saja na waleema huwa. Thore se log aaye (ziyada tar daarhi waale) aur chupke se larki ki rhuksati ho gai. Main la hol hi parhta reh gaya.

Is shadi ke paanch baras tuk main Karachi main raha magar har baar yahi suna ke larki aur larka bohut khush hain. Asim ne kai baar kaha: "Rasheed khud maulvi zaroor hai magar meri bahen pe burqe ki pabandi nahi. Meri bahen susral main bohut khush hai". Yahi baat uski amma se suni ke "allah ne hamari laj rakh li. Beti khush hai". Unke haan beta huwa to main aur asim milne gaye. Usi chote se makan main cheezain nahi thi magar mujhe hur kone se khushi aur itminan jhalkta mehsoos huwa. Rasheed ne apne kirdar aur asim ki bahen ne apni burdbari se ghar ko jannat bana diya !!

Apni saari "modernity" aur "azad-khayali" ke bawajood main rasheed ki 6 inch ki daarhi ke aage maar kha gaya. Aaj jub parhe likhe logon main 'domestic unhappiness' ke qisse aur 'divorce' ki roz broz barhti sharah ko dekhta hun to Shah Faisal colony ke ikote kamre main rehne wala Rasheeduddin ka khusion bhara gharana bohut yaad aata hai. Hum ne jiddat-pasandi ke daastane to pahen liye magar kirdar aur halimi ki chadar utar di. Baqol Mustafa Zaidi

Bacha gai kai logon ko muttahid lehrain
Dubo diya hume payabiye tamanna ne
Main kis ke haat pe apna lahu talash karun
tamam shaher ne pehne huwe hain dastaane