Karachi

(Ye nazam main ne 20 baras pehle likhi thi magar 12 may ko karachi main jo kuch huwa aur jab main ne raza rumi ki nazam parhi - it made me pull my diary and read this poem again. It was written as perody of Maulana Altaf Hussain Hali's Musaddase Mad-o-jazar Islam )


Karachi jis ka charcha hai ye kuch woh kiya hai
Pakistan se alag aik jungle-numa hai

fasanon se bharpur jis ki qabaa hai
na khaufe saza hai, na zoqe wafa hai

sabar o thammul ka is per para hai na saaya
sultane-jamhoor ka yaan qadam tuk na aaya



na police na deegar hain aese zameer perwar
Alif laila agar phir paida hon Iqbal aur Johar

na kuch aese intizam hain yahan mayassar
mujrim jis se pakre jaayain sub ke barabar

na bijli hai, nalkon main paida na paani
faqat load shedding pe hai zindagani


kaam hamare jitne hain sub rishwatana
hur aik loot aur maar main yagana

curfew main kutta hai hamara zamana
Nahi hai koi firing ka tazyaana

hum hain qatal-o-garat main chalak aese
dareende hon jungle main be-baak jese



kahin pehle jhanda lagane pe jhagra
kahin aage jalsa barhane pe jhagra

lub-e-shugal kahin banner lagane pe jhagra
kahin mini bus ke jalne jalane pe jhagra

yunhi roz laraii hai be-khauf hum main
yunhi roz chalti hai kalashnikov hum main



pathrao hamari din raat ki dil-lagi hai
pistol hamari ghutti main goya pari hai

sifarish hai, zalalat hai, begaangi hai
garz hur tarah hum main jahalat bhari hai

bahut khun ki hum ne bahai hai nadyan
kub nekiun pe chaii chatain gi ye badian