survivor

Fareed Khan se meri mulaqat Chicago main hui. Koi 3 baras meri Fareed Khan se salam dua rahi. Ajeeb hi rang ka aadmi tha.

Kubhi T shirt pahen ke Chicago ki sardi main nikal parta. Bus na aati to paidal hi meeloN chal leta. Gas station ki naukri chuti to 'cab' chalani shuru ker di. Kuch dinoN baad kisi posh restaurant main 'bartender' ho gaya. Jitni sharab pila do hawas gum nahi hota. Ji kerta to charas (weed) bhi pi leta. Magar saath hi kisi roz masjeed main imamat kerne wala na milta to ye bhi ker deta. Angrezi bolta to pata na lagta ke peshawar se aaya hai. Aap ne idhar challenge kiya aur dusre roz lurki uske saath coffee pi rahi hai.

Aik din kafi lurke saath jama ho gaye aur raat sone ki jagah na mili to kitchen ke farsh pe aaram se so gaya. Aik din shor macha diya ke 'Ab sab bahir niklo bhook lagi hai'. Hum McDonald se drive thru le ker nikle to apna bag homeless ko thama diya aur phir poore din shikayat na ki ke bhook lagi hai.....Hum se aksar kehta: Is bhook, piyas, sardi, garmi, bimari wagera pe ziyada dhiyan nahi dena chahiye zindagi ka maza kharab ho jaata hai!

Zindagi main yahi hasrat rahi ke kisi roz phir mulaqat ho to us se poochun ke Zindagi main aese kis kare waqt se guzra - ke ab use koi mushkil - mushkil nahi lagti - bulke use zindagi aik khel lagti thi. Baqol Ghalib

Ranj se khugar hua insaN to mit jata hai ranj
mushkileiN mujh par pari itni ke asaN ho gain