A Urdu writeup

From Shamshi Zia

وہ جب جب ملنے آتی تھی۔۔۔۔

کچھ نہ کچھ بھول کے جاتی تھی۔۔۔۔

میرا کمرا بھرا پڑا اسکی چھوٹی چھوٹی چیزوں سے۔۔۔۔::

یہ ہیئر پنز، بال بندھے تو سزا لگتا تھا اسے۔۔۔۔۔۔۔

یہ انگوٹھی، میں نے کہا تھا کہ۔۔۔۔۔

کیسی بھدی سی ہے، تو یہیں رکھ چھوڑی۔۔۔۔۔۔۔

یہ اوپر سے چبائی پنسل، بھوکی کہیں کی۔۔۔۔۔۔

یہ چھوٹی سی نوٹ بک، بڑے بڑے خواب لکھتی تھی اس میں۔۔۔۔۔۔

یہ ٹوٹی ہوئی چوڑیاں، مجھے مارنے کو اٹھی تھی اور دیوار میں جا لگی۔۔۔۔۔

کیسے بچوں کی طرح پھوٹ پھوٹ کے روئی تھی، توبہ۔۔۔۔۔۔۔۔

یہ بانو قدسیہ کا ناول، آدھا پڑھا اور یہاں چھوڑ دیا۔۔۔۔۔۔

اور یہ برسوں پرانی جیکٹ، جانے کیا اچھا لگتا تھا اس میں اسے۔۔۔۔۔۔۔

سانس نہیں لیتی تھی اسکے بغیر۔۔۔۔

اب دیکھو پچھلی سردیوں سے یہیں دھری ہے۔۔۔۔۔۔

پھر یوں ہوا بہت مدت نہیں آئی وہ مجھ سے ملنے۔۔۔۔۔۔

کیسا سناٹا رہا کرتا تھا ان دنوں اس کمرے میں۔۔۔۔۔۔۔

آج آ رہی ہے ملنے مجھ سے، کہتی تھی۔۔۔۔۔

آخری الوداع ضروری ہے۔۔۔۔۔

میں نے بھی کہہ دیا اب کچھ بھول کے مت جانا۔۔۔۔۔۔۔

آئی، کچھ دیر رکی، نہ کوئی بات، نہ چیت۔۔۔۔۔۔۔

چپکے چپکے روتی رہی اور پھر چلی گئی۔۔۔۔۔۔۔

اور یہ دیکھو، پانی کے گلاس پہ چھوڑ دیئے نا اس نے لپ سٹک کے نشان۔۔۔۔۔۔۔

ارے پاگل، میری جان۔۔۔۔۔۔

تو جہاں کہیں بھی رہے لیکن

تھوڑی سی تُو۔۔۔۔۔۔۔

میرے کمرے میں رہتی ہے۔۔۔۔۔۔.