Zindagi main aksar aesa hota hai ke kisi baat ka aakhri safha abhi likha jana baqi hota hai. Zindagi main koi waqiya, koi shaks, koi baat, koi event bazahir khatam hone ke baad bhi dil main adhura sa reh jata hai. Kubhi kubhi woh safha likhe jaane main barson lug jaate hain - the last chapter of the book - jis ke baad woh kitab hamesah ke liye dafan ho jaati hai. Dil ko qarar sa aa jata hai. Phir woh yaad kahin chup chap bethe bethe kachoke marna chor deti hai.
Aroosa aur main saath hi aik gali main bare huwe. Woh bilkul meri sagi bahen ki tarah thi. Main MBBS ke 3rd year main tha jub aroosa ki shadi ho gai aur woh canada chali gai. Shadi ke koi 4 baras baad aroosa phir Pakistan aai. Hum bachpun ka ilaqa chor ker kahin aur shift ho gaye the. Aik din aroosa ne mujhe phone kiya ke aaj mere saath bachpan ki usi gali main chalo, main use dekhna chahti hun. Ye woh zamana tha jub gali gali MQM ke logon pe chape par rahe the. Aur woh gali MQM ke aese ilaqe main thi ke jaana khatre se khali na tha. Magar hum dono wahan chal pare. Gali ke agaz pe hi aik bara darwaza tha, jis pe MQM ke 2 lurke pehra de rahe the (Karachi main rehne walon ko yaad ho ga ke kese 1990 ke ashre main gali gali pe 'gates' bana ker poore shaher ko band ker diya gaya tha). Qissa mukhtasar, lurki saath thi to un do lurkon ne koi aetraz na kiya aur hamare liye taala khol diya. Hum gali ke ander paunche. Aroosa kafi der tuk hur makan ko takti rahi. 2/4 purane jaanne wale bhi mile. Gali ke dusri taraf ander hi aik chota sa naya cinema theatre ban chuka tha. Hum ne woh bhi dekha. Sham dhale hum wahan se nikle. 2 din baad Aroosa phir canada chali gai.
Is baat ko barson beet gaye. Main ne bhi Pakistan chor diya. Aroosa phir kubhi Pakistan nahi gai. Ab ki baar main Canada gaya to Aroosa mili. Main ne aroosa se poocha, tum phir kubhi Pakistan nahi gai, tumhara dil nahi chahta? Us ne jawab diya, "Pehli baar Pakistan chorte huwe main ne apna sab kuch chor diya tha magar koi aik cheez wahan reh gai thi. Pata nahi kiya tha magar 4 baras baad koi cheez jo pehli baar Pakistan se chalte reh gai thi, us roz us gali main mil gai. Jis din hum us bachpan ki gali main gaye, mere dil main aik itminan aa gaya. Ab Pakistan mujhe bilkul yaad nahi aata. Pakistan ki kitab us din mere dil main hamesah ke liye band ho gai".
5 comments:
sigh...aapk beginning paragraph ...wah!Its rare that people put your thoughts into words. Mager qissay ki akhir ki baat par aitraaz hoa :)..Shayad isliye keh main khudh musaafir houn. Koi jaga kabhi apni na thi...mager kissi bhi jaga say hamesha keh liye safa band karne ka socha bhi nahi. Shayad aisay hi chal parain unhi rahoun par and different moments are born again.
hmm...its ajeeb. Now that I reread the beginning paragraph it rings only of the story you told. It has lost what it meant to me on my own :(.
Hmmm... kuch kahaniaan adhoore he chor dene ko dil kartaa hei... jaane unka aakhree safha, last chapter kaisa ho... shaid aisa ho jis se man ko khauf ataa ho... aakhir insaan kitni kahaniyaan band kare, or kiyun kare? Aur kiya kahaniyaan wakaee khatam ho jaatee hein yaa hamaare saath hei dafan hoti hein?
Dimension Z
Annonymous 1
I am glad atleast it portrayed some of yr feelings. I am myself, also not very much out of Pakistan-euphoria but many ppl. somehow shut their chapters very easily !
Annonymous 2
Achhi baat kahi ke... aakhir insaan kitni kahaniyaan band kare, or kiyun kare?
Ye yaadon ka nasha bhi khub hota hai..you don't want them and you don't want to leave them either !
is it this easy to forget ur childhood...din agree but its beautifully written .
Anuja, its hard to get away with "yaadain" but being remain attached is another thing. I guees.
Liked your last line on your post: "So. Yes. Delhi, we meet again."
Post a Comment