Aaj jo post main likhne ja raha hun, us ko parh ker aap ko gussa aaye ga, ghin aaye gi, dukh ho ga - aaya aap ke andar koi talatum paida ho ga bhi ya nahi - mujhe nahi maalum.
Main bhi rozana hur insaan ki tarah akhbar parhta hun aur duniya bhar ki khabrain sunta hun, un pe kurhta hun, bahes kerta hun, duhaiyan deta hun aur phir raat ko chen ki neend so jaata hun. Kuch hafton pehle main Pakistan gaya aur wahan mulk ke halat dekh ker main kafi disturb lota. Neeche likhe gaye tin waqiyat ko 'absorb' kerne main mujhe din nahi bulke hafte lug gaye aur main aik ajeeb zehni takleef main mubtala raha. Aesi takeef mujhe aakhri baar aaj se 5 baras pehle us waqt hui thi jub main ne Rohinton Mistry ka novel "A Fine Balance" Parha tha !
1. Geo TV wale Pakistan ke 'aik aam aadmi' se interview ker rahe the - jinhe hum kammi kamin ya diplomatically 'low class' log kehte hain. Aese hi aik kammi kamin se pucha gaya ke: 'Zindagi main tumhari kiya khwaish hai?' to us ne jawab diya: 'Mera dil kerta hai anda aur seb (Egg & apple) khaun?' - itni gurbat !
2. Karachi paunchne ke baad aik din main apne bachpun ke aik dost se milne purane mohalle gaya. Main ne us se kaha: 'ghar pe khul ker baatain nahi hongi, chalo aaj nihari ki usi hotel pe beth ker khana khate hain jahan betha kerte the'. Jub hum hotel pe bethe to us ne kaha: 'yaar daal chawal mangwa lete hain' ! - Mujhe ye baat samjhne main der nahi lagi ke us ki jeb main Nihari aur Naan ke paise nahi ! Jis mulk main aik theek thak parha likha shaksh Naan Nihari afford na ker sake - zara sochiye !
3. Karachi main mere aakhri do din the. Main apne aik dost ke saath 'lasbela ke aik chai khane' pe bethe - Pakistan ke halat pe apne dil ke pahphole phor raha tha. Mujhe yaqeen nahi aa raha tha gurbat itni barh chuki hai aur uski wajah se street crime, gadagari aur prostitution is qadar aam ho chuki hai.
Mere dost ne jo baat kahi, usi ki zabani suniye:
"Tum Pakistan main street crime, prostitution aur gadagari ka zimmedar sirf corrupt hukumat ko qarar kiun dete ho. Is kharabi main muhashre ke har tabqe ka kum ya ziyada magar kuch na kuch qasoor zaroor hai. Jahan hukumat ka corruption hai wahan logon ka ye qasoor hai ke unho ne bhi apni khuwaishat ko bohut barha liya hai. Us pe media ke dramon main aalishan makan, gariyan, khubsurat libas aur pur-taayush zindagi ki tasveer ne subah sham jo aag lagai hai woh alag hai. Hur shaks ko Car, cell phone, cable, computer, shampoo, branded shoes aur naye naye kapre pahnne ka shoq hai. Sharab peena ab fashion main shamil hai. Aaj main tumhe apne ghar ka aesa qissa sunata hun jo sirf meri zaat tuk mehdood tha.
Tum jaante ho main theek thak salary kamata hun magar mere ghar main rozana meri biwi se jhagra hota tha kiunke mere liye uski hur 'aarzu' ko pura kerna mumkin nahi tha. Peechle 6-8 mahine se ye jhagre bohut barh gaye the. Us din bhi bohut jhagra huwa. Mujhe office ke kaam se aksar 2/3 din ke liye hyderabad jaana parta tha. Us din jhagre ke baad main hyderabad nikal gaya. Wahan pauncha to yaad aaya ke sare zaroori kaagzat to karachi main reh gaye. Jhagre ki wajah se dimag thikane pe hi nahi tha. Un kaagzat ke bagair meri meeting bekaar thi. Main ne office walon se keh ker meeting postpone kerwai aur usi waqt bus le ker karachi wapas nikal para. Sham ke waqt karachi pauncha. Mohalle main daakhil huwa to mere dono bachhe safoora apa ke ghar main ghus rahe the. Main ne poocha: 'wahan kiyun?' to bole: 'ammi kahin ja rahi hain. Raat der se lotain gi' Mujhe baat ajeeb lagi. Mere paas ghar ki chabi thi. Main bagair bataye chupke se andar daakhil huwa. Meri biwi sirf undergarmets pehne bedroom main tayyar ho rahi thi. Jis design ki panty usne pehni thi woh aik sharif gharane ki aurat shayed na pehne. Use CD player ke shor main mere aane ka aehsas nahi tha. Main chup chap ghar se nikal gaya. Kuch der baad meri biwi ghar se nikal ker main road per aayi. Main uske peeche chalne laga. Thore aage ja ker aik gari aa ker ruki aur meri biwi us main beth gai. Meri biwi aik call girl bun chuki thi !!"
Chalte chalte BBC ki ye News bhi parh lijye Grim life for Bangladeshi prostitutes
3 comments:
ya Allah khair :(.
Insaan ki khawahishaat hi ussay maar deti hain...and it is the very same which make a man as PaK as he can be. Mujhe itna rona aur dukh us saib/anday aur daal chawal ki baat par nahi aya jitni is akhri dost ki realization par aya. The wants and needs of the first two are pure. They know what they have and what they want. Acha nahi hota ager insaan ko in basic needs ki taruf hi mehnat karni parti? Phir subkuch milne keh baad uskeh khayalat itnay kharab na ho jate :(
I was reading mohammad asad's the road to makkah. And he speaks of the Dajjal. Kehte hain keh this one eyed devil who can cross the world in seconds...can bring the dead to life and the living to death could in essence be the modern man made to possess such unholy "needs". Sub paisay ki taruf hi bhagte. How is this not worshipping money over God? They begin to believe wholy in science and themselves (itni AanA aur gharoor)..and they put God onto an old bookshelf to be looked upon as mythology :(.
What happened to this friend after this discovery?
First of all thanks for tip on an important read (Road to Makkah).
When I asked my friend: "Ab kiya halat hain?"..to us ne jawab diya: "Ab hum saath nahi hain"
aage puchne ki mujh main na himmat thi aur shayed na koi zaroorat.
bus baaz auqat hamari khwahishat hamein kahin ka nahi chorti. bare duain kerte the k 'jeun to shan se aur marun to eeman se'. bus yehi sub se comprehensive dua aur khwahish hai duniya ki
Post a Comment