Acceptance

Zindagi main insaan ki saari khushi ka daro-madar sirf aik lafz pe hai - "acceptance" (qabool ker lena).

Biwi saari zindagi is liye 'unhappy' rehti hai - kiunke shohar ko 'accept' nahi ker pati. Shohar saari zindagi biwi se nalaN rehta hai. Kisi ko haar (defeat) 'accept' nahi hoti. Aashiq ye 'accept' nahi ker pata ke mehbooba us ki nahi ho sakti.

Aur agar insaan accept kerne pe aaye to 'wheel chair' ko bhi accept ker leta hai - jese mera dost asif - jo jawani main hi paraplegic ho gaya. Jese koi majboor aurat apne tawaaiif hone ko piyar se nibha jaati hai. Parents aulad ki maut tuk seh jaate hain. Beti ke dukh pe pehle hi is blog pe kai posts hain.

Dil ki jalan se markatul-araa 'art, literature, poetry' janam leti hai, magar saali andar ki bechani nahi jaati.

Agar aap ne Rohinton Mistry ka novel 'A fine balance' parha ho (nahi parha to zaroor parhiye) to uska bunyadi khayal bhi yahi hai ke: "Jin halat ko aap tabdeel nahi ker sakte, un dukhoN ko accept ker lain" - zindagi sahl ho jaati hai.

I want to write few words from one of my prev. post: ".......Is kaainat main kub saare sawalon ke jawab milte hain. Koi formula nahi chalta. Kisi mantiq ki chul theek nahi bethti. Hum saari zindagi jaanne ki tag-o-do main lage rehte hain magar saara kuch is dil ke maanne se hai. Agar dil ko qarar aa jaaye to koi maujiza naqabile yaqeen nahi rehta. Kuch bhi namumkin nahi rehta. Falsafa chale na chale magar jo baat, jo cheez is dil ki dharkan ki ley(tune) se murtaish (vibrate) ho jaaye - wahi haq, wahi sach ! Sala ye harami dil !!.."